حازم توفيق يكتب: الأمل موجود

مفيش حاجة اسمها هموت من غيرك ..!
لأن الحياة مش بتقف علي حد..!
لكن فيه حاجة إسمها هتفرق معايا كتير.
ودايما بيكون فيه ناس معينة بناخد وقت طويل قوي علشان نقتنع إنهم فارقونا، وكمان بناخد وقت أكبر علشان نقدر نتعافي من فراقهم، فيه ناس بتحكم عليهم الظروف بالبعد، وبتحط مليون ألف حاجز وحاجز بينا، بنفضل نراقب من بعيد كل تحركاتهم، مرة نطمن، مرة نسأل، مرة نبكي، مرة نزعل..
يكفي ريأكت منهم علي بوست يفرحنا، كلمة في هزار علي صورة…
صورة ليهم نفضل نبص فيها ونكلمها ، نحكيلها قد إيه واحشنا وقد إيه الشوق إليهم كبير..
لكن مع مرور الأيام وزيادة البعد والظروف الصعبة ممكن نحاول نتأقلم علي البعد والوجع ، لكن مستحيل ننسي أو نفقد الأمل إنه هيرجع من تاني، ولا ننسي العلامة الكبيرة اللي سابها في قلوبنا واللي هتفضل ظاهرة ومحسوسة وصوتها مسموع كل ما تيجي سيرته..
علشان كده دفوا قلوبكم ببعض وبلاش تقولوا هنموت من غيركم، بالعكس حسسوهم بالأمل وانكم متمسكين بيهم وانكم مش هتسلموا من أول مشكلة، قولولهم هنفضل عايشين مستنين رجوعكم، منتظرين ضحكتكم، لمستكم، هزاركم ضحككم، مستنيين عيونكم تخطفنا من تاني ..! منتظرين رجوعكم لينا ..

دايما خليكم متفائلين بالخير ، واياكم تنفروا بالشر..!
في النهاية محدش بيموت علشان حد ، لكن فيه حد بترجعله الضحكة والروح والحياة برجوع حبيبه،فيه حاجة إسمها أنا مستنيك، أنا متمسك بيك، لو مش معايا النهاردة أنا واثق إن ربنا هيخليك معايا بكرة.
فيه حاجة إسمها أنا موجود ومش هتغير ولا هتبدل ولا هبعد ولا هنساك ولا هغير وعدى ليك.
فيه حاجة إسمها وقت ما تحتاجني هتلاقيني، وقت ما تنده إسمي هكون بين إيديك..
بلاش تفقدوا الأمل في حاجة بتحبوها، وخلوا دايما عندكم أمل وثقة في الله ثم في نفسكم وفي الناس اللي بتحبوهم..
حبوا واتحبوا وعيشوا وافرحوا واضحكوا وخلوا دايما عنيكم علي الناس اللي بتحبوهم من بعيد واتمنولهم دايما الخير والفرح والسعادة حتي لو علي حساب جزء من سعادتكم.