علاء مرسي: الطريق إلى إيلات علامة خالدة في السينما.. واستلامي جائزة من المشير طنطاوي وسام على صدري
أكد الفنان علاء مرسي أن التاريخ الفني المصري زاخر بالأعمال الوطنية الخالدة، مشيرًا إلى أن فيلم "الطريق إلى إيلات" سيبقى علامة بارزة في مسيرة السينما المصرية.
وقال مرسي، خلال مداخلة تلفزيونية: "لما نفتكر فيلم الطريق إلى إيلات، بنفتكر أستاذنا العظيم الراحل عزت العلايلي، والعبقري الراحل نبيل الحلفاوي، والسيناريست فايز غالي، ولما بنفتكرهم في مثل هذا اليوم بننسى كل أعمالهم التانية ونحس إنهم معملوش غير الفيلم ده بس، لأن العمل الوطني بيعيش للأبد."
وأضاف: "تاريخ الأستاذ ممدوح الليثي مليان إنجازات كبيرة، لكننا بنقف عند أعماله الوطنية اللي أنتجها، زي فيلم الطريق إلى إيلات أو مسلسلات رأفت الهجان وجمعة الشوال، لأنها أعمال هتعيش طول العمر."
وتحدث الفنان عن تجربته في الفيلم قائلاً: "قدمت أعمال كثيرة في السينما والمسرح والتليفزيون والإذاعة، لكن دوري الأهم والأقرب لقلبي هو دوري في الطريق إلى إيلات.. لما اختارتني الأستاذة إنعام محمد علي كنت خائف جدًا ومرعوب، لأن الشخصية فيها لحظات كوميدية وتراجيدية ووطنية في نفس الوقت، وده كان صعب جدًا.. ووعدتني الأستاذة إنعام وقالت لي لو عملت الدور كويس هتاخد جائزة، وفعلاً حصلت عليها، وكان شرف كبير ليا إني استلمتها من المشير طنطاوي رحمه الله، البطل العظيم من أبطال حرب أكتوبر."
وأعرب مرسي عن حزنه لتراجع عدد الاحتفالات الخاصة بذكرى نصر أكتوبر خلال السنوات الأخيرة، قائلاً: "كل سنة كنا بنشوف ندوات واحتفالات كتير، لكن لاحظت إنها قلت في الفترة الماضية، وأتمنى إنها ترجع تاني للشوارع عشان نحرك في الأجيال الجديدة روح الانتماء، ونعرفهم مين هم أبطال القوات المسلحة اللي ضحوا بدمائهم علشان نعيش في أمان وقوة."
وختم حديثه قائلاً: "أنا سعيد بهذا اليوم العظيم، وبقول لمصر كل سنة وأنتِ طيبة، ولكل العرب إخواتنا اللي شاركوا في هذا النصر المجيد."
