تسنيم مطر: مشهد الاغتصاب في فيلم الإسكندراني كان مرعبا

كشفت الفنانة تسنيم مطر عن كواليس أحد أكثر المشاهد صعوبة في مسيرتها الفنية، وهو مشهد الاغتصاب في فيلم "الإسكندراني"، مؤكدة أنها كانت على وشك الاعتذار عن العمل بالكامل بسبب خوفها من طبيعة المشهد.

وقالت تسنيم خلال لقائها ببرنامج "الستات مايعرفوش يكدبوا"، عبر قناة "CBC": "أنا في الأول خالص لما خدت الورق كنت خايفة جدًا من المشهد، وكنت فعلًا هاعتذر عن الفيلم، لكن الأستاذ خالد يوسف قال لي: ما تقلقيش، أنا مش هعمل أي حاجة تضايقك، وفعلاً ده اللي حصل."

وأضافت: "المشهد في البداية ما كانش بالشكل ده خالص، اتعدل بعدين، وأنا كنت متخوفة لأن جمهوري أغلبه من الأطفال، ومش عايزة أعمل حاجة تبقى للكبار بس، بحب أكون قريبة من كل الأعمار، وده مبدأي من البداية."

وتابعت الفنانة الشابة: "كنت خايفة أوي من أي حاجة خارجة أو فيها تجاوز، لكن الأستاذ خالد كان مطمنّي من أول لحظة إن ده مش هيحصل، وكان فعلاً حريص على ده جدًا."

وعن تجربتها في مسلسل "وبينا ميعاد" مع المخرج والمؤلف هاني كمال، قالت تسنيم مطر إنها خضعت لاختبار أداء قبل ترشيحها النهائي للدور، موضحة: "عملت أوديشن قدام أستاذ هاني والمساعد الأول والكاستنج دايركتور، ومرفضتش خالص لأني مؤمنة إن كل دور مختلف، والمخرج لازم يشوفك بنفسه في الشخصية الجديدة."

وأضافت: "لما دخلت الأوديشن كنت متوترة جدًا، بس الحمد لله عديت تمام، وحسّيت من رياكشناتهم إنهم مبسوطين، وكان في بنت واحدة بس مرشحة معايا للدور."

واختتمت حديثها قائلة: "كل تجربة مختلفة عن التانية، وأنا بحب أتحدى نفسي وأقدّم شخصيات متنوعة، المهم دايمًا إن الجمهور يشوفني بشكل محترم ويقدر يتفرج عليا في أي وقت."